Free songs
Home / Selayu / Selayu 9: መከልከል እና መከላከል

Selayu 9: መከልከል እና መከላከል

Selayu

Selayu

መከልከል እና መከላከል

እንዴት ከረሙ ወዳጄ? ፒስ ነው? ሀገሩ፣ አየሩ፣ ድንበሩ ሁሉ ሰላም ነው? ጤናዎስ…? ያው ከዚህ ውጪ (ከሰላምታ ውጪ) ብጠይቅ none of your business እንዳይሉኝ ሰግቼ ነው ጥያቄዬ ከሰላምታ ያላለፈው፡፡

ከዚህ ውጪ መጠየቅ ክልክል ነው እንጂ ‘ነፍ’ ጥያቄ ነበረኝ፡፡ ስለባለቤትዎ፣ ስለ አዳሮ (ስለ ውሽማዎ)፣ ስለ ኢህአዴግ፣ ስለ ብሔር፣ ስለ…ኧረ ስለ ስንቱ….እስከ አገጮ ድረስ ጥያቄ አስታጥቆት ነበር፡፡ ግን ክልክል ነው፡፡

በሀገራችን በኢትዮጵያ የሚከለከል ነገር ብዛቱ! እንደው ያርግሎትና ወደ ኢትዮጵያ ቢመጡ መጀመሪያ ከኤርፖርት ወደዘመዶቾ ሲጓዙ በየአጥሩ ላይ ‘ሽንት መሽናት ክልክል ነው!’ የሚል የኢትዮጵያዊ አጥር ‘ሞቶ’ ያነባሉ፡፡ ቆሻሻ መጣል ክልክል ነው! የሚል ጽሁፍ ሁሉ ያነባሉ፡፡ እርሰዎን ካልታከቶት ሌሎች ክልክሎችን ማንበብም ይቻላል፡፡ ‘በዚህ ማለፍ ክልክል ነው!’  ‘ማስታወቂያ መለጠፍ ክልክል ነው!’..ክልክል ነው…. ክልክል ነው..ክልክል ነው….

በቀጥታ መከልከል የሰለቻቸው የሚመስሉት ደግሞ ‘ክልክል ነው’ የሚለውን በሕግ ያስቀጣል፣ ያስጠይቃል፣ በሚሉት ሲከለክሉ ጉልቤዎችም ዋ!፣ ፈረደብህ…ይላሉ፡፡ ‘ትሸናና ትሸነሸናለህ’ የሚል ካነበቡም አይግረሞት፡፡ ይህን ሁሉ ያስተዋለ ወዳጄ ‘ብዙ የተከለከለ ሕዝብ ብዙ ይከለክላል’ ብሎ ሲናገር ማብራሪያ ፈልጌ ‘ምን ማለትህ ነው’ ብዬ ብጠይቀው ‘መጠየቅ ክልክል ነው’ አለኝ፡፡ ‘ክልክል ነው’ የሰለቸው አንድ ሌላ ጓዴ ደግሞ ‘መከልከል ክልክል ነው’ ብሎ እንደፃፈ አስታውሳለሁ፡፡ እኚህ የሚከለክሉ ሰዎች በጽሑፍ መከልከል እንጂ መከላከል ስለማይችሉ ክልክላቸው ወደ መብትነት ተቀይሮ ይስተዋላል፡፡

መከልከልና መከላከል ይለያያሉ፡፡ ጀርሞችና ተሕዋስያንን መከልከል አይቻልም መከላከል ግን ይቻላል፡፡ HIVን መከልከል አይቻልም፡፡ መከላከል ግን ይቻላል (በምን? እንዳይሉኝ! መጠየቅ ክልክል ነው) እንዲህ ባይሆንማ ‘HIVን በጋር እንከላከል’ መባሉ ቀርቶ  ‘HIVን’ በጋራ እንከልክል! ይባል ነበር፡፡ እርሶ ባለቤቶን አማላይ አለባበስ እንዳይለብሱ መከልከል አይችሉም፡፡ ሌሎች አነጣጥሮ ተመልካቾችንም ባለቤቶን እንዳይመለከቱ መከልከል አይችሉም፡፡ ቀጣዩን ነገር ግን መከላከል ይችላሉ፡፡

የኢትዮጵያ ሕገ መንግሥት ብዙ የማይከለክላቸውን ነገሮች መንግሥት ሊከላከል ይችላል፡፡ ለምሳሌ ሕገ መንግሥቱ የመናገር መብትን ያረጋግጣል፡፡ መንግሥት ግን እርሶ የመናገር መብቶን ተጠቅመው ሲናገሩ ‘አፍ እላፊ’ ብሎ ሊመዘግብቦ ይችላል፡፡ ይህ መከልከል ሳይሆን መከላከል ነው፡፡ መከላከልና መከልከል አንድ ቢሆንማ መከላከያ ሠራዊት መከልከያ ሠራዊት ይባል ነበር፡፡

በአፍሪካ ውስጥ ብዙ ጥያቄ መጠየቅ ክልክል ነው፡፡ (ምክንያቱም የአፍሪካ ካርታ እራሱ የጥያቄ ምልክት ስለሆነ በእርሱ ይብቃ ተብሎ ይመስለኛል፡) ለምን ተከለከልኩ ብሎ እንኳን መጠየቅ ክልክል ነው፡፡ በዓለም ላይ ብዙ ክልክሎች አሉ፡፡ የአንዱ ቦታ ክልክል ግን ሌላ ቦታ ላይከለከል ይችላል፡፡ ለምሳሌ በአሜሪካ የመኖሪያ ፈቃድ ተከልክለው መኖር ላይከለከሉ ይችላሉ፡፡ በአፍሪካ ደግሞ የመኖሪያ ፈቃድ ሳይከለከሉ መኖር ሊከለከሉ ይችላሉ፡፡

በሉ ወዳጄ በዚሁ ልሰናበት! መጻፍ ክልክል ባይሆንም ከዚህ በላይ እንዳልጽፍልዎ የተመደበችልኝ ገፅ ከለከለችኝ፡፡ ‘መከልከል ክልክል ነው’ አለ ያ ወዳጄ!

 

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Scroll To Top